විවාහය කෙනෙකුගේ ජීවිතයේ සුන්දර අත්දැකීමක් වන අතර තවත් අයෙකුට එය අමිහිරි අත්දැකීමක් විය හැක. ඒ පිළිබඳව තොරතුරු ඔබේ කේන්ද්‍රයේ ග්‍රහ පිහිටීම් අනුව වගේම ඔබේ අත්ලේ පිහිටි විවාහ රේඛා මගින්ද පැහැදිලි වෙයි. අත්ල අයිනේ සිට සුළැගිල්ලේ මුලටත් හෘදය රේඛාවටත් අතර ඇති කෙටි රේඛා විවාහ රේඛා නමින් හැඳින්වෙයි. යමෙකුගේ අතේ මෙවැනි රේඛා නැත්නම් ඔහු හෝ ඇය තුළ කිසිවකු කෙරෙහි ප්‍රේම හැඟීමක් නොමැත. මෙම රේඛා කීපයක් තිබුණොත් ඔහුගේ හෝ ඇගේ සිත දුටු දුටුවන් කෙරෙහි බැඳෙන සවභාවයක් ඇත. ගැඹුරු ස්වභාවයෙන් යුත් පැහැදිලි තනි ඒ විවාහරේඛාව වාසනාවන්ත විවාහයක් ප්‍රකට කරයි. දැන් අපි බලමු විවාහ රේඛාවන්වල පිහිටීම අනුව එය විවාහයට කෙසේ බලපායිද කියා.
විවාහ රේඛාවේ කෙළවර හෘදය රේඛාව දෙසට බැවුම් වූයේ නම් එය අසුභද‌ායක තත්ත්වයකි. 1-1 සහකාරගේ හෝ සහකාරියගේ වෙන්වීමක් හෝ මරණයක් එමගින් පෙන්නුම් කරයි. අග බෙදුණුකරුවක් මෙන් 2-2 පිහිටි විවාහ රේඛාවද කුමන හේතුවක් නිසා හෝ අඹුසැමි වෙන්වීම හෝ ආරවුල් ඇතිවීම හෙළිකරයි. වෙන්වීමට හේතුව ස්වාමි පුරුෂයා හෝ භාර්යාව රැකියාවකට හෝ වෙනත් කාර්යක් සඳහා දුර ප්‍රදේශයක හෝ රටක වූයේ නම් ප්‍රශ්නයක් නොවේ.
නමුත් එකට ජීවත්වීමේදී සාමය නැති වූ නිසාම හෝ ප්‍රේමයේ පලුදු වීමක් නිසා නම් දික්කසාදයකට ඇති ඉඩකඩ බලවත් වේ. විවාහ රේඛාව අග 3-3 උඩින් සමාන්තරව ඇති කෙටි රේඛාවකින් පෙන්නුම් කරන්නේ විවාහයට පසු ඇතිකර ගන්නා වූ ප්‍රේම සම්බන්ධතාවකි. මෙය ස්තිර අනියම් සම්බන්ධතාවක් විය හැක. විවාහ රේඛාවේ පහළ යටින් 4-4 සමාන්තරව ඇති කෙටි රේඛාවෙන් පෙන්නුම් කරන්නේ විවාහයට පෙර ඇතිකරගත් සම්බන්ධයක් තවදුරටත් පවත්වාගෙන යන බවය.
අවස්ථා දෙකේදීම රේඛා ඉතා පැහැදිලිනම් සම්බන්ධතා ශක්තිමත් වෙයි. නමුත් එම අයගේ අධිෂ්ඨාන ශක්තිය මත ප්‍රතිඵල වෙනස්වී වෙන්වීමේ සලකුණු නොපෙනී යනු ඇත. විවාහ රේඛාව හෘදය රේඛාවට ළංව පිහිටීම 5-5 ඉක්මන් විවාහයකට හේතුවක් ලෙස සැලකේ. විවාහ රේඛාව දෙකඩ වී ඇති නම් විවාහ ජීවිතයේ හදිසි බිඳ වැටීමක්වේ. විවාහ රේඛාව ආරම්බයේදී සිහින්ව පසුව ගැඹුරුව ප්‍රබල වී නම් මුල දී යන්තමින් පැවති ආදරය පසුව බලවත් වෙයි.
රේඛාව ආරම්භයේ ගැඹුරුව පසුව සිහින්ව නොගැඹුරු වී නම් මුලදී පැවති ආදරය පසුව හීන වී යයි. විවාහ රේඛාවේ මැද හෝ අවසානයේ දුපත් සටහන් දර්ශනය වේනම් විවාහ ජීවිතය බලවත් අවාසනාවන්ත සිද්ධීන්ගෙන් ග්‍රහණ එකක් වෙයි. රේඛාවේ කෙළවර තරුවක සලකුණක් වේ නම් ප්‍රේම සම්බන්ධය දඹරයකින් කෙළවර විය හැක.
දැන් බලන්න මේ සමග පළවෙන දෙවෙනි රූපසටහන දෙස, මනාව පැහැදිලිව ඇති දෛව රේඛාවට 1-1 චන්ද්‍ර මණ්ඩලයේ සිට ඇදී එන ප්‍රබල රේඛාවක් සම්බන්ධ වී ඇතිනම් 2-2 එසේ සම්බන්ධ වන දෛව රේඛාවට අදාළ වයස් සීමාවේදී ඔහුගේ හෝ ඇයගේ විවාහය සිදුවෙයි. මනාව සෘජුව සටහන් වී ඇති දෛව රේඛාවක් පිහිටි අතක ප්‍රබල විවාහ රේඛාවකුත් සටහන් වී ඇති නම් එමගින් සදා සැපවත් විවාහ ජීවිතයක් පෙන්නුම් කරයි. ප්‍රබල රේඛාවක් වුවත් එහි දූපත් ලකුණ වැටී ඇත්නම් විවාහ ජීවිතය අසාර්ථක වේ.
ප්‍රබල රේඛවක් දෛව රේඛාව ඡෙදනය කරමින් ගුරු මණ්ඩලය දිශාවට (දබරඟිල්ලමුල) විහිද යන්නේ නම් පවුල් ජීවිතය අවුල් වීමට හේතුවෙයි. ඇතැම් අයගේ කුජ රේඛාව (3-3) ජීවන රේඛාවන් (4-4) සමග ආරම්භ වී ටික දුරක් ගොස් වෙනස් වෙයි. එම වෙනස් වන ස්ථානයට අදාළ වයස් සීමාවේ දී එම අයගේ විවාහය සිදුවෙන බව පර්යේෂණවලින් ඔප්පු වී ඇත. වෙන්වීම සටහන් වන්නේ ජීවන රේඛාවට අදාළ අවු 25 කාල සීමාවේදීය.
එකට ජීවත් වූ දෙමාපිය සහෝදර සහෝදරියන්ගෙන් තාවකාලිකව වෙන් වී සහකාර යාගේ හෝ සහකාරියගේ සරණයට පත්වෙන බව එම කුජ රේඛාව මගින් පෙන්නුම් කරයි. ඔවුන්ගේ ඇසුරේ ගතකළ ජීවිතය කුජ රේඛාවේ මගින් පෙන්නුම් කරයි. ඔවුන්ගේ ඇසුරේ ගත කළ ජීවිතය කුජ රේඛාවේ පළමු කොටසනුත් ඉදිරි යුග ජීවිතය දෙවෙනි කොටසෙනුත් අනාවරණය වෙයි.
කෙනෙකුගේ දෛව රේඛාව ශීර්ෂ රේඛාව මතදි (5-5) අවසන් වී ඇත්නම් ඔහුගේ හෝ ඇයගේ විවාහය සිදුවනු ඇත්තේ හදිසි තීරණයක් අනුවය. දෛව රේඛාවේ වයස් සීමාව අනුව එය අවුරුදු 35 ට පළමු සිදුවනු ඇත. දෛව රේඛාව හෘදය රේඛාවෙන් අවසන්වීම (6) ප්‍රේම සම්බන්ධයකින් සිදුවන විවාහයකි. හෘදය රේඛාවටත් ශීර්ෂ රේඛාවටත් අතර ඇති ප්‍රදේශයේ දෛව රේඛාව මත හතරැස් කොටුවක් තිබීම අසුභය. ස්ත්‍රියකට නම් අනියම් පුරුෂයෙකුත් පුරුෂයෙකුටනම් අනියම් ස්ත්‍රියකත් ඇති බවට සලකුණකි.
ගුරු මණ්ඩලය මත පිහිටන කතිර සලකුණ වඩාත්ම සුභද‌ායකවේ. එය වාසනාවන්ත විවාහ ජීවිතයක සැබෑ සලකුණක් ලෙස සාමුද්‍රක ශාස්ත්‍රයේ සඳහන් වෙයි. එහෙත් ගුරු මණ්ඩලය මත තාරකා සලකුණ සුභ නොවේ. විවාහ ජීවිතයේ නොයෙකුත් අවුල් වියවුල් ඇතිවීමට එය හේතුවේ. විවාහවීම සඳහා දෙගිඩියාවෙන් පසුවන අයගේ අත්වල ගුරුමණ්ඩලය හතරැස් කොටුවක සලකුණ දැකිය හැක. ඇතැම් අයගේ අත්වල මෙම විශේෂ සලකුණු තිබිය හැක. සමහරවිට එක ස්ථානයක හෝ දෙකක දැකිය හැකිවෙයි. එහෙත් කෙනෙකුගේ අත බලා පලාපල කියන්නට පළමු සැබෑ සටහන් වෙන් වෙන් වශයෙන් බලා ඒ පිළිබඳව තීරණ ප්‍රකාශ කළ යුතුය.
lankadeepa
හිඹුටානේ පියතිලක ද අල්විස්
158 හිඹුටාන මුල්ලේරියාව නව නගරය.
දු.අංක 0112419574, 0716212020
================================================
උපුටා ගැනීම් සහිතයි ....!!!
දයාබර පාථක සහෘදයිනි ඔබ මෙම වෙබ් අඩවිය හා පළකෙරෙන ළිපි පිළිඹඳව සෑහීමකට පත්වේනම් like කිරීමෙන් හා share කිරීමෙන් මිතුරන් අතරේ බෙදාහැරීමට කාරුණික වන්න...ඔබගේ වටිනා අදහස් දැක්වීමද (''Comment'') අගය කොට සළකමි...ස්තුතියි....
අබිරහස් අඩවිය - Abirahas Adawiya
No comments:
Post a Comment